بالی ووڈ کی معروف اداکارہ زرین خان کے وارنٹ گرفتاری جاری

بالی ووڈ کی معروف اداکارہ زرین خان کے خلاف مبینہ طور پر دھوکا دہی کے کیس میں کلکتہ کی عدالت نے گرفتاری کے وارنٹ جاری کر دیئے۔

واضح رہے کہ زرین خان پر الزام ہے کہ انہوں نے 2018 میں ایک شو میں پرفارمنس کے پیسے لئے تھے لیکن اس کے باوجود انہوں نے پرفارم نہیں کیا اور نہ ہی اپنی غیر حاضری سے متعلق شو کے منتظمین کو آگاہ کیا۔

بھارتی میڈیا رپورٹس کے مطابق اداکارہ کے خلاف 2018 میں مذکورہ مقدمہ درج کیا گیا تھا، کیس کے تفتیشی افسر نے اداکارہ کے خلاف کلکتہ کی عدالت میں چارج شیٹ جمع کرائی تھی۔

تاہم زرین خان نے نہ تو ضمانت کی اپیل کی اور نہ ہی متعدد بار طلب کئے جانے کے باوجود عدالت میں پیش ہوئیں، ان کی بار بار غیر حاضری کے باعث عدالت نے وارنٹ گرفتاری جاری کر دیئے۔

اس حوالے سے جب بھارتی میڈیا نے اداکارہ سے سوال کیا تو انہوں نے لاعملی کا اظہار کرتے ہوئے کہا کہ انہیں اس بارے میں کچھ علم نہیں ان کی قانونی ٹیم معاملے کا جائزہ لے گی اور اس کے بعد ہی وضاحت پیش کرسکیں گی۔