وزیراعلیٰ سندھ کا ہر بچے کو یکساں تعلیمی مواقع فراہم کرنے کے عزم کا اعادہ
وزیراعلیٰ سندھ سید مراد علی شاہ نے کہا ہے کہ ہر بچے کو معیاری تعلیم اور یکساں مواقع فراہم کرنا حکومت کی اولین ترجیح ہے، اور غربت یا سہولیات کی کمی کسی بچے کو تعلیم سے محروم نہیں کرنی چاہیے۔
یہ خبر اور ہر اہم خبر سب سے پہلے واٹس ایپ پر پائیںaround.pk اردو خبریں چینل — مفت، بغیر سپیم فالو کریں
وزیراعلیٰ سندھ سید مراد علی شاہ نے کہا ہے کہ صوبائی حکومت کی سب سے بڑی ترجیح ہر بچے کو معیاری تعلیم اور یکساں مواقع فراہم کرنا ہے۔ انہوں نے زور دیا کہ غربت، فاصلے یا سہولیات کی کمی کے باعث کسی بچے کو تعلیم سے محروم نہیں رہنا چاہیے۔ یہ بات انہوں نے این جے وی اسکول کراچی میں عالمی یومِ اطفال کی تقریب سے خطاب کرتے ہوئے کہی۔
ان کا کہنا تھا کہ بچے صرف قوم کا مستقبل نہیں بلکہ آج ہماری سب سے اہم ذمہ داری ہیں، اور ہر بچے کو خاندانی پس منظر اور مالی حالات سے بالاتر ہوکر معیاری تعلیم ملنی چاہیے۔ انہوں نے این جے وی اسکول کو سرکاری اور نجی شراکت داری کے تحت تعلیمی ترقی کی بہترین مثال قرار دیا اور کہا کہ حکومتی تعاون، پیشہ ورانہ انتظام اور عوامی شمولیت سے سرکاری تعلیمی نظام کو بہتر بنایا جا سکتا ہے۔
وزیراعلیٰ سندھ نے بتایا کہ میہڑ، تھرپارکر، بدین اور ٹنڈو محمد خان سمیت پسماندہ علاقوں میں بھی تعلیمی مواقع فراہم کیے جا رہے ہیں۔ انہوں نے کہا کہ تھرپارکر کے دور دراز گوٹھوں کے بچوں کو بھی کراچی کے بچوں جیسی معیاری تعلیم ملنی چاہیے کیونکہ صلاحیت ہر جگہ موجود ہوتی ہے اور بچوں کو صرف اسے دکھانے کا موقع درکار ہوتا ہے۔
انہوں نے کہا کہ شہری اور دیہی علاقوں کے درمیان تعلیمی فرق ختم کرنے کے لیے جدید ٹیکنالوجی کا استعمال ضروری ہے اور ڈیجیٹل ٹیکنالوجی دور دراز علاقوں کے بچوں تک تعلیم پہنچانے میں اہم کردار ادا کر رہی ہے۔ ان کے مطابق تعلیم کا مقصد صرف بچوں کو اسکولوں میں داخل کروانا نہیں بلکہ انہیں زندگی کے چیلنجز کے لیے تیار کرنا بھی ہے، جس کے لیے تنقیدی سوچ، تخلیقی صلاحیت اور عملی مہارتیں پیدا کرنا ضروری ہیں۔
وزیراعلیٰ نے طلبہ کو نصیحت کی کہ وہ مطالعہ کریں، نئی چیزیں دریافت کریں اور سوالات پوچھنے سے نہ گھبرائیں، اپنے اساتذہ اور والدین کا احترام کریں اور ایک دوسرے کی مدد کریں۔ انہوں نے کہا کہ کامیابی صرف اپنے لیے کچھ حاصل کرنے کا نام نہیں بلکہ یہ بھی اہم ہے کہ انسان اپنے خاندان، معاشرے اور ملک کے لیے کیا کردار ادا کرتا ہے۔
تقریب کے موقع پر وزیراعلیٰ سندھ نے این جے وی اسکول کی تاریخی عمارت میں تعلیمی سہولیات اور مختلف شعبوں کا معائنہ کیا اور تاریخی اولڈ سندھ اسمبلی ہال کا افتتاح کیا۔ انہوں نے اس ہال کو میوزیم میں تبدیل کرنے کی تجویز دیتے ہوئے کہا کہ اس تاریخی مقام پر سندھ کی سیاسی، تعلیمی اور جمہوری تاریخ محفوظ کی جانی چاہیے تاکہ طلبہ اور آنے والی نسلیں سندھ کے جمہوری سفر سے آگاہ ہو سکیں۔ انہوں نے یاد دلایا کہ 1947ء میں پاکستان کے قیام کے بعد سندھ اسمبلی قومی اسمبلی میں تبدیل ہو گئی تھی اور این جے وی اسکول میں سندھ اسمبلی کا پرانا ہال موجود ہے جہاں پارلیمانی کارروائی ہوا کرتی تھی۔
اب تک کی کہانی تھرپارکر
- سندھ کے کئی اضلاع میں خشک سالی کا خطرہ، این ڈی ایم اے نے ہائی الرٹ جاری کر دیا
- سندھ حکومت کا معدنیات کی تلاش اور برآمد کے لیے ملکی و غیر ملکی سرمایہ کاروں کو دعوت
- سندھ حکومت کا تھرپارکر کو آفت زدہ ضلع قرار دینے کا فیصلہ، 90 فیصد فصلیں تباہ
- تھر کے کوئلے سے صنعتی ترقی: کان کنی کی سالانہ صلاحیت 11.2 ملین ٹن تک بڑھا دی گئی








