افغان طالبان کے دہشت گرد گروہوں کو امریکی اسلحہ فراہم کرنے کے شواہد سامنے
بلوچستان میں سیکیورٹی فورسز کی کارروائی کے بعد ہلاک دہشت گردوں سے امریکی ساختہ ایم 16 اور ایم 4 رائفلز سمیت جدید آلات برآمد ہوئے ہیں، جبکہ اقوام متحدہ اور بین الاقوامی جرائد بھی افغان طالبان کی جانب سے دہشت گرد گروہوں تک اسلحے کی رسائی کے پہلو اجاگر کر چکے ہیں۔
بلوچستان میں سیکیورٹی فورسز کی ایک کارروائی کے دوران ہلاک ہونے والے دہشت گردوں کے قبضے سے امریکی ساختہ ہتھیار برآمد ہوئے ہیں، جن میں ایم 16 اور ایم 4 رائفلز، ایمنگ لیزر اور نائٹ ویژن ڈیوائسز شامل ہیں۔ رپورٹس کے مطابق یہ اسلحہ افغان طالبان کی جانب سے دہشت گرد گروہوں کو فراہم کیا گیا، جو خطے میں سلامتی کے لیے ایک سنگین خطرہ ہے۔
سامنے آنے والے شواہد میں افغان طالبان کی قیادت کی جانب سے دہشت گرد گروہ کو اسلحہ فراہم کرنے کے حوالے سے لکھا گیا ایک خط بھی شامل بتایا جاتا ہے، جسے دونوں فریقوں کے درمیان روابط کا واضح ثبوت قرار دیا جا رہا ہے۔ ایک خفیہ رپورٹ کے حوالے سے یہ بھی بتایا گیا ہے کہ بھارتی خفیہ ایجنسی نے بلوچستان میں تخریب کاری اور دہشت گردی کے لیے خطیر رقم کی ادائیگی کی۔
امریکی جریدے ایسوسی ایٹڈ پریس کے مطابق ایک انٹیلیجنس رپورٹ میں انکشاف ہوا ہے کہ پاکستان میں دہشت گردی کے حوالے سے افغان گورنر کی میزبانی میں بھارتی اور افغان انٹیلیجنس حکام کا اجلاس ہوا، جس میں کئی دہشت گرد تنظیموں کے نمائندے شریک تھے۔ اسی طرح ایک بھارتی ریٹائرڈ کرنل بھی پاکستان میں دہشت گرد حملوں میں افغان سرزمین سمیت بھارتی اور اسرائیلی کردار کا اعتراف کر چکا ہے۔
امریکی واچ ڈاگ کی ایک رپورٹ کے مطابق افغانستان میں امریکا کی جانب سے چھوڑا گیا تقریباً 7.1 ارب ڈالر مالیت کا اسلحہ افغان حکام کی سرپرستی میں دہشت گرد تنظیمیں استعمال کر رہی ہیں۔ اقوام متحدہ سمیت بین الاقوامی جرائد بھی افغان طالبان کی جانب سے فراہم کردہ امریکی ہتھیاروں کی دہشت گرد گروہوں تک رسائی کے سنگین پہلو کو بے نقاب کر چکے ہیں۔
ماہرین کے مطابق افغانستان میں موجود بے شمار امریکی اسلحے کا غیر سرکاری گروہوں کے ہاتھوں میں جانا نہ صرف پاکستان بلکہ پورے خطے کی سلامتی کے لیے خطرہ ہے۔ اس حوالے سے عالمی برادری، بالخصوص اقوام متحدہ، سے مطالبہ کیا جا رہا ہے کہ وہ اس معاملے کی آزادانہ تحقیقات کرائے اور اسلحے کی غیر قانونی منتقلی کو روکنے کے لیے ٹھوس اقدامات کرے۔
پاکستان کی سیکیورٹی فورسز کی جانب سے برآمد شدہ جدید اسلحے اور آلات اس بات کا عندیہ دیتے ہیں کہ دہشت گرد گروہوں کو نہ صرف تربیت بلکہ جدید ٹیکنالوجی تک رسائی بھی حاصل ہو رہی ہے۔ حکام کا کہنا ہے کہ اس حوالے سے مزید شواہد اکٹھے کیے جا رہے ہیں تاکہ بین الاقوامی سطح پر اس معاملے کو موثر انداز میں اٹھایا جا سکے۔
