امریکا کا 150 سے زائد افغان شہریوں کو پاکستان کے راستے کابل بھیجنے کا منصوبہ

امریکی صدر ڈونلڈ ٹرمپ کی انتظامیہ نے 150 سے زائد افغان شہریوں کو امریکا سے پاکستان کے راستے واپس کابل بھیجنے کا منصوبہ تیار کیا ہے۔ امریکی اخبار نیویارک ٹائمز کی رپورٹ کے مطابق اس واپسی کا سلسلہ ممکنہ طور پر پیر کے روز شروع ہو سکتا ہے، جب پہلی پرواز امریکا سے روانہ ہونے کا امکان ہے۔

رپورٹ کے مطابق ڈی پورٹ کیے جانے والے افراد میں ممکنہ طور پر ان افغان شہریوں کے رشتہ دار بھی شامل ہیں جنہوں نے کابل میں طالبان کی واپسی سے قبل امریکی فوج کے ساتھ تعاون کیا تھا۔ افغان شہریوں کے لیے کام کرنے والی ایک رضاکار تنظیم نے یہ معلومات فراہم کی ہیں۔

امریکی حکام کے مطابق انتظامیہ ان افراد کو براہِ راست کابل بھیجنے کا انتظام نہیں کر سکتی، اسی لیے پاکستان ان کی افغانستان واپسی کی نگرانی کرے گا۔ اس حوالے سے تاحال دونوں ممالک کی جانب سے تفصیلات جاری نہیں کی گئیں۔

انسانی حقوق کی تنظیموں نے اس اقدام کو ان افغان شہریوں کی زندگی کے لیے خطرہ قرار دیا ہے۔ ان کا کہنا ہے کہ جن افراد نے امریکی مشن کی حمایت کی تھی، انہیں واپس بھیجنا ان کے تحفظ کے حوالے سے سنگین خدشات پیدا کرتا ہے۔

واضح رہے کہ ڈونلڈ ٹرمپ نے گزشتہ برس افغانستان سمیت متعدد ممالک پر سفری پابندی عائد کی تھی، جو غیر ملکی شہریوں کے خلاف سخت اقدامات اور افغان شہریوں کو حاصل تحفظ کے خاتمے کا حصہ قرار دیا گیا تھا۔ اگست 2021 میں افغانستان میں طالبان کی واپسی کے بعد امریکا پہنچنے والے کئی افغان شہریوں کو خصوصی ویزے بھی جاری کیے گئے تھے۔

یہ پیش رفت ایسے وقت سامنے آئی ہے جب خطے میں نقل مکانی اور پناہ گزینوں سے متعلق امور پر بحث جاری ہے۔ پاکستان پہلے ہی افغان شہریوں کی بڑی تعداد کی میزبانی کر رہا ہے، اور اس معاملے پر مزید تفصیلات سامنے آنے پر صورتحال واضح ہو سکے گی۔